LEGAZPI CITY – Plano ngonian kan Lokal na Gobierno kan Daraga na matawan nin food packs an labi 30,000 na pamilya antes magsapit an aldaw kan kapaskuhan.
Segun ki Daraga Public Information Officer Renz Luna sa intrevista kan Bombo Radyo Legazpi na kompwesto an food packs nin pancit, mga condiments o pangrekado, asin kape.
Magigin katuwang man kan lokal na gobierno an mga opisyales kan kada barangay kan banwaan nganing maray na mai-distribwer an food packs mantang may naenot na sindang ibinarewas na stub na gagamiton ninda para sa pagresibi.
Piglalaoman man ninda na matapos ngonian na bisperas nin kapaskuhan an pagbabarewas nin ayuda para sa saindang namamanwaan.
Pigkokonsiderar man kan opisyal na enuton an mga nasa hararayong parte kan banwaan huli sa accessibility factor asin isusunod an mga nasa ka-sentruhan sagkod sa maubos an gabos na barangay na matawan.
Obheto suboot kan lokal na gobierno na magserbing paglaom sa gabos na residentes kan saindang banwaan sa gabos na mga kadifisilang hinampang ngonian na taon asin may maihanda ngonian na noche buena.
Pighayag man ni Luna enkaso maalokaran nin pondo an pwedesir na magbarewas sinda nin year end foodpacks alagad enkaso dae maisakatupadan, promesa niya na masusunudan an saindang distribusyon nin foodpacks sa masunod na kapaskuhan.
