LEGAZPI CITY- Inuyunan kan gobierno provincial kan Albay an kasuguan ni Presidente Rodrigo Duterte na ribayan kan mga ladawan kan 14 heroe kan Pilipinas puon ki Lapu-Lapu hasta ki Rizal an mga nakakaag na imahe kan mga opisyal kan gobierno sa mga pampublikong eskwelahan asin ahensya de gobierno.
Sa intrevista kan Bombo Radyo Legazpi ki Danny Garcia, tagapagtaram ni Albay Governor Al Francis Bichara, suportado kaini an lakdang urog na igwa suboot na tamang oras asin lugar para sa mga ini.
Suhestiyon pa ni Garcia na gamiton an mga nasabing ladawan kan opisyal sa mga panahon nin kampanya tangarig na mamidbidan. Masasabutan man suboot kun gagamiton ini sa promosyon kan sarong lugar, regular na mga proyekto asin sa proper area siring kan kapitolyo na mahihiling man magin an mga dating nagsirbe.
Inako man kaini na makasawa kun pirming nahihiling an pandok kan siisay man na politiko sa mga bako angay na sirkumstansya na nagagastos pa an kwarta kan tawo.
Magigirumduman na si Executive Secretary Salvador Medialdea an nagbaba kan direktiba na Memorandum Circular 25 susog sa otoridad kan presidente kan nakaaging Setyembre 15 asin opisyal na ipinaluwas sa publiko kan Setyembre 27.
Obheto kaini an pagpapakusog sa nasyunalismo kan mga tawo, pagkamoot sa nacion asin respeto sa mga heroeng nagdusay kan buhay para sa Pilipinas.
