LEGAZPI CITY – Inapod na imoral asin bakong kaako-ako an napag-aramang pagbakal kan Department of Education (DepEd) nin mahal asin outdated na laptops para sa distance learning kan mga paratukdo sa panahon kan pandemiya.
Susog sa findings kan Commission on Audit (COA), taong 2021 kan magbakal an DepEd sa paagi kan Procurement Service-Department of Budget and Management (PS-DBM) nin laptop na nasa P58,300 an kada yunit alagad pwedeng mabakal sa kantidad na P35,046.50.
Sa intrevista kan Bombo Radyo Legazpi ki ACT Teachers Party-list President Raymond Basilio, nakakamati nin pagkadisganar, dagit asin pagkamundo an grupo urog na aram kun papanong nadificilan an mga paratukdo mataparan sana an pangangaipo.
Pigkukwestiyon pa digdi na kadaklan man sa mga paratukdo an warang naresibeng laptop kaya kinaipuhan pang mag-loan para sana makabakal. Hinahagadan man ni Basilio nin paliwanag an DepEd kun napasain ang laptops.
