LEGAZPI CITY- Sinusog kan sarong transport leader sa syudad kan Legazpi an pigsasabing guidelines kan Department of Interior and Local Government (DILG) dapit sa mga behikulong dapat na ipagbawal sa national highway.
Sigon ki Dante Marigondon, pinagbabawal sa nasambitan na guidelines kan ahensya na maglaog sa national highway an mga behikulong may gabat na labi sa apat na tonelada para sa obhetong pang-seguridad.
Rason ni Marigondon, wara man nin nag-aaging truck sa Rizal St. kun kaya libre dapat sindang makalaog sa nasambitan na tinampo.
Nagtutubod ini na pagbalgar sa saindang karapatan an dae digdi pagsunod kan LGU.
Dugang pa ni Marigondon, sala an rason kan BCERG na nagkakawsa nin gubot sa trapiko an mga tricycle kun kaya nabilog an No Entering the National Road Policy.
Nanindogan man ini na dae sinda naimpormaran dapit sa public hearing para sa implementasyon kan ordinansa huli ta solamenteng an mga kaalyado man sana suboot kan BCERG an inimbitaran na siertong dae makontra sa ano man na ilalatag nindang plano.
Apwera digdi, sinabi man kan transport leader na dae na nin ibang ginibo an lokal na gobyerno kundi an rauton an imahe kan mga tricycle drivers sa syudad asin manginabang sa pinagalan kan mga ini.
