LEGAZPI CITY—Pigbabantayan ngunyan kan Philippine Institute of Volcanology and Seismology sa kun mababarahan an bunganga kan bulkang Mayon na presenteng nagtetenir sa Alert Level 3.
Segun sa pahayag ni Phivolcs Volcano Monitoring and Prediction Chief Mariton Bornas, maaraman ini kun igwang biglang pagbaba nin sulfur dioxide emission o bako na episyente na nakakapag-degas an magma huli sa may bara an bunganga kaini; asin ikaduwa an pagpundo o lull na aktibidad kan bulkan.
Basado kaya sa historya kan Mayon, kadaklan sa highly explosive eruption kaini an nangyayari tuyong igwa nin period of lull — o boot-sabihon na makalihis na magluwa nin lava ini, an masilensyo an bulkan nin sarong aldaw o sarong semana na kalimitang precursor nin explosive eruption.
Dugang kaini, huli kan mga nairerehistrong ground deformation o mga pagbabago sa luwasan kan bulkan an piglalaoman man an biglang pamamaga kaini huli sa nape-pressurized kan nawawalat na volcanic gas an edifice kan Mayon.
Sienerto man kan opisyal na nakabantay an ahensya, asin tulos man na iluluwas an anumang advisory o bulletin en kaso may mahiling na senyales na itataas ini sa Alert Level 4.
Sa ngunyan, bastante na suboot an 6-kilometer permanent danger zone na kaipuhang likayan kan namamanwaan.
Nagpatanid man an opisyal sa peligrong dara kan lahar flow huli sa pwedesir ining magkawsa nin lapnos sa balat o matangay an sarong indibidwal na pwedesir na ikagadan en kaso na magdakula pa an pagbulos kaini sa mga salog harani sa bulkan.
