Posible suboot na padiit-diit nang mamamatian an pagbabago sa political alignment kan nagkapirang mambabatas, kasunod kan deklarasyon ni Vice President Sara Duterte na madalagan siya bilang presidente sa 2028 elections.
Segun ki Caloocan Rep. Edgar Erice, syertong mapapansin an nagkapirang pagbabago sa alyansa kan nagkapirang mambabatas, urog na kung pag-oolayan asin pagdedesisyunan an impeachment complaint laban ki VP Sara.
Sa ibong kaini, nagtutubod si Erice na madepende man liwat an desisyon kan mga mambabatas dapit sa reklamo laban sa bise presidente kun pano idedepensa kan saiyang kampo an mga alegasyon na nakalaog sa mga reklamo.
Sa ngonian, nahahampang an bise presidente sa apat na impeachment complaints na isinangat sa manlaen-laen na aldaw.
Segun ki Erice, sa ibong kan posibleng ikonsiderar kan kampo kan bise presidente na strategic an saindang amay na deklarasyon, kadakol pa man liwat an mabago sa laog nin duwang taon o antes an 2028 polls.
Sa ibong na lado, poon kan magdeklarar si VP Sara na madalagan siya bilang presidente sa masunod na eleksyon, nagpoon na man an saiyang kampo na mag-organisar nin manlaen-laeng support groups.
Saro digdi an Masa-Sara Duterte Alliance (MASADA), sarong nationwide campaign na nag-eengganyar sa labi 32 milyong Pilipino na suportaran liwat an bise presidente para sa ikaduwang beses.
