LEGAZPI CITY- Mahigot na pigkokontra kan Kabataan Partylist Albay an propuestong liwat na pagbuhay sa padusang kagadanan sa Pilipinas bilang solusyon sa naglalalang kriminalidad.
Tinawan duon ni Dave Ostonal kan Kabataan Partylist na kontra sinda sa death penalty huli ta pagbalgar ini sa karapatang pantawo.
Pagbalgar suboot ini sa Konstitusyon partikularmente sa Bill of Rights na klarong nagsasabi dapit sa karapatan kan lambang tawo sa nasyun na mabuhay.
Dugang pa ni Ostonal, nagtutubod sinda na pagbabago asin plataporma an kinakaipuhan ngani na maresolbaran an padagos na paglangkaw kan mga krimen.
Ginirumdom man kaini an sinabi kan pambansang herowe kan Pilipinas na si Jose Rizal na “Youth is the hope of the Fatherland” kun kaya dapat man suboot na magkaigwa pa nin mga positibong pagbabago sa lado kan edukasyon ngani na mareyalisar an haloy nang pangiturugan na magkaigwa nin paz y orden.
Kusog boot pang ipighayag ni Ostonal na bako an paggadan an mawot na puturo kan mga jovenes alagad an puturo na igwa nin totoong libertad asin hustisya para sa gabos.
