LEGAZPI CITY – Pigpapadusahan suboot an salang partido sa propuestong lakdang na babaan an minimum age kan criminal liability hale sa 15 anyos, magiging 9 anyos ini.
Segun ki AKO-Bicol Party-list Rep. Alfredo Garbin Jr., sala suboot an pokus kaini huli sa piggagamit an mga menor de edad sa paggibo nin krimen.
Kaipuhan suboot na padusahan an mga adult syndicates, asin bako an mga menor de edad na biktima kan pangyayari sa nasabing kaso.
Pig-eksplikar pa ni Garbin na an kadaklan sa mga menor de edad na piggagamit kan mga sindikato an mga pig-abandonang aki, pigpabayaan kan mga magurang, wara nin tamang edukasyon, asin kulang nin giya kan mga magurang.
Imbes suboot palalaaon an sitwasyon, kaipuhan suboot na mas pagianon susog sa ley an kamugtakan kan mga siring na aki.
An House leadership mismo an nagbubusol kan propuesto na pagbaba kan minimum age kan criminal responsibility.
