LEGAZPI CITY — Naobserbaran an pagbaba kan nagkapirang lahar deposits o natipon na volcanic materials sa bulkang Mayon huli sa makusog na pag-uran na na-eksperyensyahan kan provincia kan Albay.
Base sa latest Mayon volcano bulletin kan Philippine Institute of Volcanology and Seismology (PHIVOLCS), nahiling an pagbulos kan channel-confined lahars sa river channel sa Anoling, banwaan kan Camalig mantang nagkulay-dugi man an nagkapira pang river channels partikular na an Mi-isi, Bonga asin Basud Gullies makalihis na magkaigwa nin sediment-laden streamflows.
Katakod kaini, padagos an pagpapagirumdom kan ahensya sa publiko na dae maglaog sa ipigtalaan na 8-kilometer-radius danger zone urog na mantenido sa Alert Level 4 status an bulkan.
Mientras tanto, hinale man ni Albay Public Safety and Emergency Management Office (APSEMO) chief Dr. Cedric Daep an pangandam kan publiko na sinabing manipis pa sana man umano an nababawas na deposito puon sa itaas asin naka-confine pa sana sa river system mantang wara pa man an mapandestrosong lahar sa presente.
Dugang pa ni Daep na pighihiling na advantage kan nagkapirang residente an pag-uran tangarig na madumog an abo asin dae maray na magsabay sa paros siring man an paghugas sa mga pananom na apektado kan ash fall.
