LEGAZPI CITY- Nagpahayag nin pagkahadit asin kamunudan an sarong halangkaw na opisyal kan Philippine Atmospheric, Geophysical and Astronomical Services Administration (PAGASA) sa propuestong ibalyo ini asin an Philippine Institute of Volcanology and Seismology (PHIVOLCS) sa bibilugon na Department of Disaster Resilience.
Sa intrevista kan Bombo Radyo Legazpi ki PAGASA Deputy Administrator for Operations and Services Dr. Landrico Dalida Jr., namumundo ining isipon na mapapaseparar na sa orihinal na departamento o an Department of Science and Technology (DOST).
Nagtutubod man si Dalida sa magayon na intensyon kan pagtipon kan mga ahensya na nakasentro sa disaster resiliency alagad gari bako suboot ka-level kan PHIVOLCS asin PAGASA bilang warning agencies an iba pang kaibanan na nasa response team.
Dae man kaini ipigkokonsiderar na problema an pagbaba nin warning tangarig na ma-implementar kan mga team kun en kaso.
Sa ibong na lado, ikinahahadit man ni Dalida an posibleng pagka-displace kan nagkapira sa mga personahes sa Administrative Division urog na pagsasararuon na sana an mga departamento.
Mientras tanto, bukas man sa pagsunod an nasabing opisyal sa obheto kan lakdang na para sa ikararahay kan gabos alagad pakiolay an asegurasyon para sa mga madadalaganang trabahante kan DRR.
