LEGAZPI CITY — Nagpaluwas nin flood advisory an Philippine Atmospheric Geophysical and Astronomical Services Administration (Pagasa) huli naman sa naeeksperyensyahang kamugtakan kan panahon kun sain nag-iiral an hanging habagat o southwest monsoon na naaapektaran an sulnupang parte kan Luzon.
Base sa general flood advisory number 5, posibleng maapektaran kan pag-uran o maglangkaw an tubig sa mga salog sa anom provincia kan Bicol.
Inabisuhan man mga residente na mag-ingat urog na an nagtetenir harane sa Guinale asin Upper Donsol Rivers sa Albay; Lower Donsol, Ogod, Putiao, Cadacan, Banuang-Duan, Fabrica (Tugbugan) asin Matnog sa Sorsogon; sa Catanduanes an mga harane sa salog kan Cabuyan, Bato asin Pajo; asin sa Masbate an Lanang, Mapayawan, Mandaong, Asid, Malbag, Guiom, Nainday, Daraga, Nauco (Aguada) asin Beleno.
Mientras tanto, kaipuhan man na mag-ingat an mga harane na sa salog kan Lower Kilbay Catabangan, Ragay, Tinalmud, Tambang asin Lagonoy sa Camarines Sur, asin an Labo, Daet, Basud Rivers sa Camarines Norte.
Apwera kaini, inabisuhan man an mga nagtetenir sa bulod na mag-ingat asin idenisignar an mga local disaster risk reduction and management councils na magkondusir nin precautionary measures katakod naman kan nasabing kamugtakan kan panahon.
