LEGAZPI CITY- Pulitika an pighihiling na anggulo sa nangyaring pambabadil gadan sa dating baranggay kapitan kan Brgy. Makacabugos, banwaan kan Libon sa Albay.
Sa inisyal na imbestigasyon kan Tabaco City Police Station, napag-araman na tulong taon nang nagseserbing kapitan si Salvador Malana asin nagpahingalo sana nin sarong taon alagad planong liwat na magdalagan ngunyan na maabot na eleksyon.
Hali sa syudad kan Tabaco an biktima kan tambangan ini kan dae pa nabibistong riding-in tandem suspects na lunad kan motorsiklong warang plaka.
Sa suway na intrevista, pigtaram man ni PC/Insp. Arthur Gomez na saro si Malana sa miyembro kan notorious Concepcion gun for hire group na minsan na man na nagtestigo sa kalaban na grupo.
Mientrastanto, dae man kinumpirmar ni PC/Insp. Jon Retumban, deputy chief of police kan Tabaco PNP an koneksyon kan nasambitan na detalye asin tutok sa motibong politika.
Sa presente nagpapadagos pa an ipigkokundusir na imbestigasyon kan mga otoridad dapit sa ikakaarestar kan mga suspek.
