LEGAZPI CITY – Paramientras munang tinanggal sa serbisyo an duwang pulis na nakuwaan nin video mapadapit sa saindang agresibong pag-aresto sa mga imbwelto sa tupada o illegal cockfighting sa Barangay Laurente, San Pascual, Masbate.
Segun ki Police Regional Office 5 Public Information Officer Police Lieutenant Colonel Malu Calubaquib sa intrevista kan Bombo Radyo Legazpi na an nasambitang lakdang an kaipuhan nganing magtaong dalan sa pigsasagibong imbestigasyon.
Kun pagbabasehan suboot an nagluwas na video an mahihiling na ginamit kan mga pulis an saindang fuersa huli ta nagpo-porbar na dae magpa-aresto an saro sa mga nadakop sa operasyon.
Afuera sa duwang imbweltong police personnel an kabale man sa mga na-relieve an mismong hepe kan San Pascual Municipal Police Station.
Pigtaram pa kan opisyal na enkasong mahiling na may pagbayolar sa ley ginibong pag-aresto an posibleng masunadan nin kasong kriminal asin administratibo an mga imbweltong pulis.
Pagdoon pa niya na dae pigtutugutan kan saindang ofisina an anumang klase nin agresibong pag-aresto sa mga indibidwal na nagkasala sa ley.
Pagirumdom ni Calubaquib sa mga pulisya na gibuhon sana an saindang mandatong magserbi sa namamanwaan nganing dae na mautro pa an nasambing insidente.
