LEGAZPI CITY — Iniladawan kan hepe kan Legazpi City Police na si P/Supt. Nilo Berdin bilang “peaceful” an pag-obserbar kan Semana Santa sa syudad.
Sigon sa chief of police, dae sindang nairehistrong insidente nin panghahabon o panghohold-up huli ta nasangatan na suboot ninda nin kaso an mga mandurukot sa lugar.
Alagad, igwa nin mga naarestar na persona katakod kan illegal discharge of firearm asin kaso nin pambabadil durante kan nasambitan na panahon.
Enot na nagbungkaras an bareta dapit sa nangyaring agawan nin badil sa pagultanan kan suspek na si Melvin Arias asin biktimang si Leo Esquivel.
Napag-araman na haros sarong taon pa sanang nakakalibre si Arias gikan sa pagkakakulong asin nakabalik ngunyan sa preso makalihis an nasambitan na insidente.
Mientrastanto, nakakulong na man suboot ngunyan an magkaparientes na sinda Mario Bulawan asin Marlon Bulawan huli sa pambabadil ki Von Richard Lorilla sa Barangay Barriada.
Naka-full alert status an Legazpi CPS kan Holy Week kun sain nagdeploy nin dakol na pulis sa mga places of convergence.
Sa presente, maski tapos na an Semana Santa, liwat man giraray na nagpagirumdom si Berdin sa publiko na maglikay asin magin marigmat ngani na dae mabiktima nin ano man na krimen.
