LEGAZPI CITY – Pormal nang pinunan kan Tiwi Municipal Fire Station an pag-obserbar kan fire prevention month ngonian na bulan nin Marso.
Segun ki Tiwi Municipal Fire Station Fire Prevention Section Chief Senior Fire Officer 3 Edward Adalla sa intrevista kan Bombo Radyo Legazpi na sa ginibo nindang kick-off ceremony, inatendiran ini kan lokal na gobierno asin manlain-laing stake holders.
Importante suboot an pag-obserbar kaini tuyong Marso huli ta ini an bulan na kalimitang naghahalangkaw an temperatura kan nacion na nagkakawsa nin kasulo.
Basado man sa saindang datos, mga nasusulong kawad nin kuryente an saindang narerespondehan sa banwaan poon kan maglaog an presenteng taon.
Pigheras man kan opisyal an saindang plano ngonian na bulan kabale na an pagbisita sa mga barangay nganing magtao nin kaaraman sa saindang residente mapadapit sa fire safety tips.
Pangapodan man ni Adalla sa publiko na mag-ingat sa paggamit nin mga kagamitan sa kusina na saro sa mga lugar sa kaharongan kun sain kalimitang nagpopoon an kasulo asin dae paglingawan na ipa-check an saindang mga electrical wirings nganing masyerto an kaligtasan kaini.
