LEGAZPI CITY- Pinasimple na an proseso tangarig na ma-isyuhan kan Department of Environment and Natural Resources (DENR) nin special permit to cut an ahensya kan Department of Public Works and Highways.
Ini an tinawang-duon ni DENR Development Management Officer III Mary Cil Dating katakod kan nagin intrevista kan Bombo Radyo.
Kasabay suboot sa mga pagbabago sa proseso kan naaprubaran asin ibinaba an kasuguan dapit sa Department Order no. 7 series of 2017 na nagtutugot sa regional director kan ahensya na mag-apruba kan mga permit asin dae na ipapadara pa sa central office.
Ipig-eksplikar kaini an pasunod-sunod na lakdang puon sa application kun saen kinakaipuhan na magsumiter an DPWH nin cite development plan asin straight line diagram sa puputulon na kahoy, pagsasagibo kan tree inventory kan mga foresters, dayalogo sa local government unit asin mga stakeholder para sa issuance kan certificate of no objection, pagtatao nin justification, paghagad kan environmental compliance certificate hasta sa pinal na pag-apruba.
Dugang pa ni Dating na nape-pendiente sana an proseso en kaso kulang an mga pigsusumiteng rekisitos.
