LEGAZPI CITY — Ipigbubusol ngonian kan sarong disaster management expert an pag-institutionalize kan Disaster Risk Reduction (DRR) education sa tabang kan Department of Education (DepEd) bilang central avenue.
Parte ini kan nagin pahayag ni Albay Public Safety and Emergency Management Office (APSEMO) chief Dr. Cedric Daep sa isinagibong regional disaster management caravan sa Bicol para sa pag-obserbar kan National Disaster Resilience Month ngonian na Hulyo.
Segun ki Daep, komon na simbag kan mga dinumanan na lugar sa Pilipinas magin sa luwas kan nacion na matinding nirapado kan kalamidad an kawaran nin kaaraman sa kakahampangon na konsekwensiya kaya nauuli sa mas dakol na destroso asin casualty.
Katakod kaini, suhestiyon ni Daep an pagsasapormal kan edukasyon sa DRR sa mga eskwelahan alagad nakasentro sa Philippine approach an learnings and teaching tangarig dae magcausa nin pagkaribong.
Nagtutubod man si Daep na ini an ‘best way’ tangarig na makapag-develop nin disaster resilience and strategies asin mapakusog an manpower support sa pag-otob kan ‘zero-casualty goal’ durante kan mga kalamidad.
Napag-araman na kasabay si Daep sa mga pig-iimbitaran na magsirbe sa pigki-krear na National Disaster Resilience Department.
