LEGAZPI CITY-Nagabot suboot sa P1 billion an kwartang naipadara sa penthouse ni Ako Bicol Rep. Zaldy Co sa Shangri-La Hotel, Taguig.
Kasunod ini kan mga ipigbuyagyag ni dating district engineer kan Department of Public Works and Highways sa pagdangog kan Senate Blue Ribbon Committee ngonian na aldaw, Setyembre 23.
Segun kay dating Bulacan 1st District Engineer Brice Hernandez, na labi sa 20 maleta suboot an igwang laog nin kwarta na isinakay sa anom o pitong mga van pasiring sa penthouse kan kongresista, kun sain ipig-abot suboot ini sa sarong tauhan ni Co na binisto bilang si “Paul”.
Pignegaran man ni Hernandez na dai man direktang nagpahiling si Co, alagad nahiling niya suboot ini na kaolay si dating DPWH-Bulacan district engineer Henry Alcantara.
Katakod kaini, kinumpima man ni dating assistant engineer Jaypee Mendoza an mga detalye sa paghahatod kan nasabing kwarta.
Sinabi ni Mendoza na sa mga enot na taon an sa Shangri-La Hotel ipigsasagibo an mga transaksyon, mantang sa mga masubot na taon an ipiglipat na sa Valle Verde 6, na harong suboot kan kongresista sa Pasig.
Magigirumduman na si Ako Bicol Rep. Zaldy Co an dating chairman kan House appropriations committee, asin kairiba sa mga mambabatas na pigiimbestigaran katakod kan mga anomalya sa flood control projects kan Department of Public Works and Highways.
