LEGAZPI CITY- Klinaro kan Department of Education (DepEd) Bicol na taong 2007 pa kan ipautob an Department Order #8 series of 2007 o an Revised Implementing Guidelines on the Operation and Management of School Canteens in Public Elementary and Secondary Schools.
Sa intribista kan Bombo Radyo Legazpi ki Mark Kevin Arroco, tagapagtaram kan DepEd Bicol, ineksplikar kaini na sa irarom kan nasambitan na kasuguan, pigbabawalan an gabos na pampublikong eskwelahan sa elementarya asin hayskul na magtienda asin magpabakal nin softdrinks asin chichirya sa laog kan bisinidad.
Ini ngani suboot na i-promotir an marhay na salud sa mga kaakian sa paagi kan mga masustansyang pagkakan arog kan prutas, maluto, root crops asin iba pa.
Sigon pa ki Arroco, kun in kaso igwa nin mawot na magpaabot nin reklamo, yaon an grievance committee sa lambang schools division office.
Bako man suboot istriktong marhay an ahensya sa pagsangat nin ano man na penalidad kun sain pwedesir na iagi muna sa pag-oolay an mga mabalgar alagad kinakaipuhan na magsagibo na nin lakdang sa mga seryoso nang kaso asin pauru-utrong dae pagsunod sa patakaran.
Sa ngunyan, sinabi ni Arroco na dae man sinda nin nareresibeng mga reklamo dapit digdi kun kaya naglalaom sindang nagsusunod an gabos sa nasambitan na kasuguan.
