LEGAZPI CITY – Dae man suboot striktong maipapaotob sa Estados Unidos an pag-implementar kan pag-ban sa social media platform na Tiktok sa oras na mag-asumir sa opisina si Incoming President Donald Trump.
Magigirumduman na nagdesisyon an US Supreme Court laban sa naunambitang app kan Biyernes, asin ipigbasura an saindang apela sa paagi kan sarong ley na epektibong nagbabawal kaini sa nasambitang nacion.
Segun ki Bombo International Correspondent Rosemarie Wagner sa intrevista kan Bombo Radyo Legazpi na nagpoon an isyu asin orolay kan pagban poon pa kan Abril 2024 makalihis na pirmahan ini ni Outgoing US President Joe Biden.
Nagkawsa suboot an desisyon sa kahandalan kan US Government na manipulahon kan gobierno kan China an content asin magkaigwa nin access sa sensitibong data kan user sa paagi kan app na kagsadiri kaya kan Chinese company na ByteDance kun kaya naitulak suboot ini sa Kongreso nganing ipagbawal an naunambitang platform.
Base man sa saiyang interpretasyon na dae man ini istriktong ipapaotob ni Trump an nasabing pagban nin huli ta gusto pa kaining maggibo nin political resolution mapadapit sa mga siring kaining social media apps.
Pigtawan doon pa ni Wagner saro man suboot ini sa mga platform na ginamit ni trump nganing manggana kan kakatapos pa sanang US Election kun kaya diskompyado siyang mapapaotob ini nin maray.
Saro na man suboot an Tiktok sa mga primary social media platform nin huli ta kadakol na man an nagkakaigwa nin ganansya kun kaya magigin difisil ini sa mga tawo na sa naunambitang application sana naglalaom kan saindang hanapbuhay.
Pigdownload na man kan saiyang mga kababayan na nakatenir sa US an mga videos ninda sa tiktok nin huli sa takot na dae na ninda ma-access an Tiktok.
Sa facebook na man suboot nagrilipat an mga negosyanteng maaapektaran kan nasabing pagban nganing dae mawara an saindang ganansya dawa papano.
Paglinaw pa ni Wagner na imbitado man sa inauguration ni Trump an CEO kan Tiktok kun kaya pwedesir pa ining pag-olayan kan duwang lado.
