LEGAZPI CITY- Nanindogan an Social Action Center kan Archdiocese of Legazpi na warang makusog na basehan ngani na i-octaba an nakatalaan na Barangay asin Sangguniang Kabataan elections.
Segun ki SAC Director Father Rex Arjona, nagtutubod ining dae dapat na maoctaba an pirilian huli ta direchos kan mga namamanwa na makaboto kan mawot na magin pamayo kan barangay.
Segun pa ki Arjona na bako sana simpleng isyu an dae pagkakaigwa nin pirilian huli ta dakulang importansya ini urog na sa panahon ngunyan kun sain an mga barangay officials an imbwelto sa pagtatao kan pangangaipo kan saindang mga constituentes.
Inapod man kan padi na ‘worst case scenario’ an pagtatao nin poder ki Presidente Rodrigo Duterte na mag-appoint nin mga opisyal huli ta saro ining porma nin diktadurya kasabay kan paghagad na magpaluwas nin ebidensya sa pahayag na 40% kan mga opisyal an imbwelto sa illegal drug trade.
Sa ibong kaini, pighayag kan padi na masunod man giraray sinda sa ley huli ta tinawan nin poder an mga lehislador na magpaotob kaini.
