LEGAZPI CITY — Paburu-bagong wind system an rason kun nata dae nakakapagdeklarar an Philippine Atmospheric, Geophysical and Astronomical Services Administration (PAGASA) nin pormal na pagpuon kan hot and dry season sa nasyun.
Base sa pag-eksplikar ni PAGASA Weather Forecaster Ryan Orogo, igwa pa nin hanging amihan na iyo an nagdadara kan malipot na panahon sa nagkapirang parte kan nasyun kabale na an norte asin katahawan kan Luzon mantang easterlies an naeeksperyensyahan sa mga parte kan Katimugang Luzon, Visayas asin Mindanao.
Ini man suboot an rason kan naeeksperyensyahang katamtaman sagkod sa makusog na paros an nagdadara nin maukol na kadagatan kun kaya nakasakat ngunyan an gale warning sa eastern seaboard kan Southern Luzon kabale na an seaboard kan Camarines Sur, Catanduanes, eastern coast kan Albay asin eastern coast kan Sorsogon.
Dae man nin pigbabantayan na raot kan panahon sa Philippine Area of Responsibility (PAR) sa ngunyan kun sain ipighayag ni Orogo na nasa zero hasta sa one percent sana an tsansa na mabilog an sarong bagyo sa bulan kan Abril.
Mientrastanto, madiklom man an panahon sa haros gabos na lugar sa Bicol na ipigtatakod sa pagsabat kan malipot na paros o tail end of a cold front na piglalaoman na mahaloy pa nin mga duwanga aldaw.
