Legazpi City- Padagos na nadudugangan an bilang kan danyos na nairehistro sa rehiyon kan Bicol makalihis an panrarapado kan Bagyong “KRISTINE”.
Sa intrevista kan Bombo Radyo Legazpi kay Gemil Naz, an tagapagtaram kan Office of the Civil Defense Bicol, maabot na sa P8. 8 billion an danyos na nairehistro sa rehiyon.
Maabot na man sa P2.9 billion an danyos sa sektor kan agrikultura mantang maabot sa P5 billion an nairehistrong danyos sa infrastructure o mga katinampuhan huli sa regionwide an nairehistrong epekto kan naunambitang bagyo.
Sa presente igwa pang maabot sa 29, 715 na families o katampad kan 120, 796 na indibidwal an nasa laog kan mga evacuation center. Mantang maabot man sa 39,477 families o 164, 672 individuals an nagtitinir sa ibang mga kaparientes.
Nagtitinir pa hasta sa ngunyan an mga dae mabalikan an nagkapirang mga lugar huli sa nagtitinir ining lubog sa baha.
Mientras tanto nadagdagan pa man an datos kan mga nagadan huli sa raot kan panahon na uminabot sa 16 death, 5 missing , asin 74 injured hale sa nagkapirang lugar na apektado kan kalamidad.
Padagos pa man an pakikisumaro kan Ahensya sa pagtatarabangan asin paghahanap sa mga biktima sa nagkapirang lugar na apektado kan nakalihis na kalamidad.
Mientras tanto nakahanda na man an ahensya sa panibagong raot nin panahon. Nagsagibo naman nin Predisaster assesment an ahensya bilang paghahanda sa epekto ni bagyong “MARCE “.
