Inaprubaran kan Department of Budget and Management (DBM) an Budget Circular No. 2024-6 na nagtatala nin mga mandato para sa pagtatao nin medical allowance sa mga kuwalipikadong empleyado kan gobyerno poon kan Enero 1, 2025.
An allowance na ini, na dae malagpas sa P7,000 kada taon, an magseserbing subsidiya para sa mga benepisyong arug kan health maintenance organization (HMO).
Sakop man kan benepisyong ini an gabos na civilian personnel sa mga ahensya kan pambansang gobyerno, kaiba an mga state universities and colleges asin government-owned and controlled corporations, anuman an saindang estado kan appointment, regular, casual, o contractual, appointive o elective, asin full-time o part-time.
Kaiba man digdi an mga empleyado sa mga local government units asin local water districts.
Posibleng maresibi an allowance sa anyo kan HMO-type product coverage o bilang cash para sa mga mag-a-avail o magbabayad/magre-renew kan saindang presenteng HMO-type benefit, asin para sa mga nagbayad kan saindang medical expenses arug kan hospitalization, emergency care, diagnostic tests, asin medicines.
