LEGAZPI CITY- Bako pa 100% tapos an pagpapakarahay sa mga billeting centers kan mga delegado na maabot sa syudad kan Legazpi para sa Palarong Bicol 2017.
Sigon ki Engr. Noel Encinares kan City Engineering’s Office, kulang pa nin istruktura an ibang classroom na gagamiton kan mga atleta.
Kabale suboot sa saindang dugang na iko-konstruhir an mga kusina sa 12 billeting centers arog kan sa Bagumbayan asin iba pang pasiring sa Brgy. Rawis.
Dugang pa ni Encinares, an lokal na gobyero kan Legazpi an nag-alokar kan dakulang parte kan pondo para digdi huli ta nagkukulang nin budget an Department of Education (DepEd) na nakatagama na an kwarta para sa K-12 program.
P3.2 million suboot an enot na budget para sa mga billeting areas alagad dinugangan ini kun kaya nagin P5.9 million para sa pagdugang nin mga istruktura.
Sigon pa ki Encinares, mapuon na sinda sa pagkonstruhir kan mga kusina ano man na oras kun mapakarahay na an mga papeles.
Suhestyon man kaini na magkaigwa nin programa an DepEd na magkaigwa nin ispasyo para sa mga tutugdukan nin permanenteng istruktura ngani na dae na magpaburu-bago tuyong may dakulang event arog kan Palarong Bicol.
