LEGAZPI CITY—Maabot sa P5,100,000.00 kantidad nin pinagtutubudang shabu na may gabat na 750 gramo an nakumpiskar kan mga otoridad gikan sa sarong pigkokonsiderar na High Value Individual sa Purok 3, Barangay Salugan, Camalig, Albay.
Segun ki PIO Camalig Municipal Police Station, Police Executive Master Sergeant Marly Gragasin, sa intrevista kan Bombo Radyo Legazpi, an suspetsado minidbid sa alyas na “Anton”, 47-anyos, may agom, sarong negosyante, asin residente kan Barangay Magurang, Polangui, Albay.
Nakumpiskar sa suspetsado an tulong plastic sachet na may laog nin pinagtutubudang shabu.
Pigtaram kan opisyal na haloy nang pigmamanman ini kan Regional Police Drug Enforcement Unit na kun saen sa banwaan kan Camalig nangyari an saindang transaksyon kaya digdi mismo sa lugar naarestar an suspetsado.
Sa presente, an suspetsado nasa kustodiya na kan Camalig MPS asin pwedesir na mahahampang sa kasong pagbalgar sa Republic Act 9165 o Comprehensive Dangerous Drugs Act of 2002.
Mientrastanto, dugang kan opisyal na dawa idineklarar na drug-cleared na an mga barangay asin munisipyo kan Camalig, dae mapundo an saindang ahensya na hanapon an mga nagdadara o nagbebenta nin mga ilegal na droga asin padagos an saindang pagmamanman sa siring na mga gibuhon sa nasambitang lugar.
