LEGAZPI CITY—Arestado kan mga kapulisan an sarong street-level drug personality sa Sitio Jacinto, Barangay Tinigban, Aroroy, Masbate.
Segun ki Aroroy Municipal Police Station, Deputy Chief of Police, Police Captain Antonio Padilla Jr., sa intrevista kan Bombo Radyo Legazpi, binisto an suspek na si alyas “Aicel,” 42-anyos, babae, may agom, asin residente kan nasambitang lugar.
Naarestar an suspek huli sa bisa kan search warrant na inisyu ni Hon. Jose Ronald M. Bersales, Executive Judge kan Regional Trial Court, 5th Judicial Region, Masbate City na may petsang Agosto 27, 2025.
Naarestar si alyas “Aecil” sa pinagsarong operatiba kan Aroroy MPS, Provincial Police Drug Enforcement Unit, PDEA Masbate asin Masbate Police Provincial Office.
Nakumpiskar saiya an pigtutubudang shabu na may gabat na nasa 7 gramos asin may street value na P47,600.
Segun sa opisyal na an inventory, markings asin dokumentasyon kan mga nakumpiskar na ebidensya an isinagibo sa hampang kan suspek asin kan mga testigo.
Tinawan-duon kan opisyal na seryoso an saindang mga pigsagibong mga operasyon kontra ilegal na droga nganing mapuho asin magin drug-free na an provincia kan Masbate partikularmente na an banwaan kan Aroroy.
Dugang pa ni Padilla na duwa na sanang barangay—an Barangay Poblacion asin Barangay Puro an bako pa drug-clear sa nasabing banwaan na sa ngunyan nasa proseso na sa pagsumiter nin mga papeles sa PDEA nganing ma-clear na man an mga ini.
Mantang maikokondiserar na drug-clear na an ibang barangay, sinabi man kan opisyal na padagos man giraray an saindang pag-monitor sa mga posibleng mga ilegal na aktibidades sa lugar.
Mientrastanto, abiso man kaini sa namamanwaan na en kaso may mga impormasyon sindang mapadapit sa mga indibidwal na imbuelto sa ilegal na droga na makipagkoordinar sa saindang opisina nganing tulos ninda ining maaksyunan.
