Nakatalaan na magpaluwas nin P328M na pondo an Department of Health (DOH) para sa 22 na tertiary hospitals sa bilog na nasyon nganing mabayadan an gastos sa pagpapabulong.
An pagbayad sa mga hospital bills kan mga pasyenteng naka confine asin an mga under medication an kaiba sa mga birthday gifts ni Presidente Ferdinand R. Marcos Jr. sa paagi kan programang “Handog ng Pangulo: Serbisyong Sapat para sa Lahat.”
Sa saiyang mensahe sa paglulunsar kan “Agri Puhunan at Pantawid Program” sa Guimba, Nueva Ecija ngunyan na biyernes, sinabi ni Presidente Marcos na mawot kan gobyerno na balikatin an pangangaipong medikal kan mga tawong naka confine asin nagsasairarom sa pagbulong sa mga pampublikong ospital.
Inilunsar ngunyan na Biyernes an programang “Handog ng Pangulo: Serbisyong Sapat para sa Lahat.” Kun sain sabay sabay nanao nin tabang asin pagtao nin serbisyo kan gobyerno sa 82 probinsya sa nasyon.
Obheto kaining matawan nin karahayan an saindang buhay sa paagi kan mga programa, asin tabang kan mga starter nganing magin accessible asin mas harani sa mga Pilipino an mga serbisyo kan gobyerno asin an sarabay na paghiro pasiring sa Bagong Pilipinas.
Kaiba sa mga ahensya kan gobyerno na magtaong serbisyo an Department of Agriculture (DA), Department of Social Welfare and Development (DSWD), Department of Health (DOH), asin Department of Trade and Industry (DTI).
Nakisumaro man sa nasabing programa an Department of Labor and Employment (DOLE) asin Technical Education and Skills Development Authority (TESDA).
