Ipapadagos kan administrasyon ni Marcos an P300 bilyones na pondo para sa mga flood control projects ngonian na taon sagkod sa 2026, kasabay kan pagbubugtak man nin mas mahigot na regulamento nganing maseguro an tamang paggamit kan pondo.
Ipinahayag kan Presidente sa saiyang pagbisita sa Gonzaga, Cagayan, na parte kan proseso iyo an labing pagrepaso kan mga proyektong isusumiter asin aprubaran, kabali na an pagkaigwa nin malinaw na programa nin trabaho, tamang pagkumpleto, asin pagtanggap hale sa lokal na gobyerno.
An katuyuhan kaini iyo na maseguro an integridad kan mga proyekto bago ini pormal na iimplementar asin i-turn over.
Tinawan doon kan Palasyo na an gobyerno maserbi sanang parabantay kan mga buwis na pigbabayadan kan mga tawo, asin dapat na seguradohon na an lambang sentimo mapaduman sa kapakinabangan kan publiko.
Sa orden kan Presidente, P255.5 bilyones man an nai-forward hali sa pondo kan Department of Public Works and Highways (DPWH) para sa flood control, pasiring sa mga prayoridad na programa kan manlaen-laen na ahensya kan gobyerno.
Parte man kan direktiba an pagbalik kan proseso nin “acceptance” kan mga lokal na gobyerno bago ikonsiderar na tapos na an arin man na proyekto kan gobyerno nasyonal.
Katuyuhan kan lakdang na ini na maseguro an kumpletong implementasyon kan imprastraktura asin maibitaran an mga iregularidad na naeksperyensiyahan sa mga nakaaging flood control asin iba pang darakulang proyekto.
