LEGAZPI CITY- Nag-abot sa P3.4 milyon na kantidad nin shabu an narekober kan mga otoridad sa isinagibong buy bust operation kontra sa magkarelasyon na high value target sa Barangay Bitano, Legazpi City sa provincia nin Albay.
Sa intrevista kan Bombo Radyo Legazpi kay PDEA Albay Provincial Officer Noe Briguel, dati ng pigbabantayan kan saindang team an mga suspek na binistong sinda Erigen Villanueva asin Mark Dave Lonsame na naglipat pa nin barangay makalihis na makamalisya na mainit na sa mga otoridad.
Taong 2016 man kan minsan ng makasohan huli sa pinagbabawal na droga an suspek na babaye alagad nagbalik na naman ini sa iligal na kalakaran kung kaya isinararom sa buy bust operation.
Nakua hali sa duwa an tolong patos nin shabu na may gabat na 550 gramos asin nagkakantidad nin nasa P3.4 milyon.
Sa ngunyan nakakarsel na an mga suspek na nahahampang sa kasong pagbayolar sa Acta Republika numerado 9165 o an Comprehensive Dangerous Drugs Act of 2002 mantang pigsasairarom naman an mga ini sa imbestigasyon nganing maaraman kung sain pigkukua an bultohang suplay kan iligal na droga.
Nagtao man nin pasasalamat si Briguel sa mga opisyal kan Barangay Ant-Drug Abuse Council kan Bitano na nagtabang ngani na maging matrayumpo an nasabing operasyon.
