LEGAZPI CITY—Arestado sa ikinundusir na drug buy-bust operation an sarong lalaki makalihis na mahiling sa aktong nagpapabakal nin pigtutubudang ilegal na droga sa Barangay Sta Cruz sa banwaan kan Virac, Catanduanes.
Nakumpiskar sa suspek an apat na plastic sachet na pigtutubudang shabu na nagkakantidad nin P204,000 asin sarong glass tube, buy bust money asin iba pang non-drug item.
An suspek sarong 31-anyos, residente kan Barangay Rawis kan nasambitang banwaan asin pigtutubudang nagpapabakal asin naggagamit nin ilegal na droga.
Naarestar ini sa pinagsarong operatiba kan Virac Philippine National Police, Regional Police Drug Enforcement Unit, asin Provincial Intelligence Unit Catanduanes.
Sa presente, nasa kustodiya na kan Virac MPS an suspek para sa magkakanigong disposisyon asin posibleng mahampang sa kasong pagbalgar sa Republic Act 9165 o Comprehensive Dangerous Drugs Act of 2002.
Mantang an mga nakumpiskar na drug items an isasairarom sa laboratory examination.
