LEGAZPI CITY- Nag-abot sa P2.8 milyon an kantidad kan mga nakumpiskar na pirated DVD asin storage devices kan mga otoridad sa isinagibong operasyon sa mga establishimento asin tindahan sa Barangay Bitano asin Barangay Orosite sa ciudad nin Legazpi.
Inilunsar an operasyon kan mga personahes kan Optical Media Board (OMB) asin Legazpi City Police kung sain saro-saro na inenspeksyon an gabos na mga nagtitinda nin DVD asin mga storage device siring kan Flash drive, USB, asin micro SD card.
Nag-abot sa 17 sako nin pirated na DVD an nakumpiskar sa nasabing operasyon na kantidad P2,380,000 mantang igwa man nin 650 pidaso nin storage device na kantidad P559,000.
Sa ngunyan, dinara na kan mga personahes kan OMB an mga nakumpiskar na items nganing i-dispose mantang nakatalaan man na sangatan nin kaso an mga establishimento na nakuwaan kan mga iligal na DVD asin storage devices.
