LEGAZPI CITY—Takdag sa kamot kan mga otoridad an duwang lalaki makalihis na makumpiskar digdi an ilegal na droga asin badil sa Brgy. Mahayahay, Cawayan, Masbate.
Naarestar an duwang suspetsado sa bisa kan search warrant na ipinaluwas kan RTC Branch 49 sa Cataingan, Masbate, huli sa pagbalgar sa Republic Act 9165 o Comprehensive Dangerous Drugs Act of 2002 asin Republic Act 10591 o an Comprehesive Firearms and Ammunition Regulation Act.
Binisto an mga suspetsado na sinda alyas “Bab”, 53-anyos, lalaki, warang trabaho, asin residente kan Purok 3, Brgy. Mahayahay, Cawayan, Masbate; asin si alyas “Lor”, 45-anyos, lalaki, driver, asin residente kan Purok 4, Brgy. Taberna, Cawayan, Masbate.
Nakumpiskar digdi an pigkakarkulong 25 gramo nin pigtutubudang shabu na may kantidad na labing P170,000 asin nagkapirang drug paraphernalia.
Afuera sa pigtutubudang shabu, nakumpiskar man sa mga suspetsado an tulong klase nin badil siring kan kalibre .357 revolver, Smith & Wesson kalibre .357 magnum, asin sarong kalibre .45 pistol, magin an manlaen-laeng klase nin bala.
Sa presente nasa kustodiya na kan Cawayan MPS an mga suspetsado asin an mga nakumpiskar na ebidensya para sa magkakanigong disposisyon.
