LEGAZPI CITY — Poco mas o menos P14 million an magagastos kan rehiyong Bicol sa paglaban kaini sa paparaning Palarong Pambansa 2017 na ikukundusir sa San Jose de Buenavista, Antique.
Sa intribista kan Bombo Radyo Legazpi ki Engr. Ronald Asis, Secretary General kan Palarong Bicol Board, sinabi kaini na P14 million an itinagamang pondo para sa mga gabos na preparasyon kan Bicol region delegates.
Dugang pa ni Asis, gikan an P10.11 million sa Department of Education (DepEd) Central Office asin P3.7 million an gikan sa DepEd Bicol.
Magastos man suboot sinda nin P5 million para sa byahe pa sana kan 650 delegado.
Ipigheras man kaini na urog na halangkaw ngunyan an insentibong mareresibe kan mga manggagang atleta kumpara kan nakalihis na taon.
Ini huli suboot sa halangkaw na pondong nakua hale sa isinagibong Bicol Color Run.
Naglalaom an nasambitan na opisyal na magigin dugang na motibasyon ini sa mga pambato kan rehiyon ngani na ipahiling pa an saindang urag sa manlaen-laen na sports na paglalabanan.
