LEGAZPI CITY—Aprubado na an P100 milyones na medical assistance para sa indigent asin financially incapacitated na mga pasyente sa Legazpi Hospital sa Legazpi City, Albay.
Segun ki Legazpi City Mayor Atty. Pido Garbin sa intrevista kan Bombo Radyo Legazpi, na pinag-source out ninda an pondo sa Department of Health, na kun saen an enot kuta nindang kahagadan kantidad P50 milyones, alagad dinugangan ini para masakop an pangangaipo afuera sa hospital bills kundi pati na an kakulangan sa mga bulong asin medical equipments.
Dugang kan opisyal na an naunambitang P100 milyones, downloaded na sa ciudad para pwedesir nang mag-akseptar nin mga indigent o mga financially incapacitated sa pagbayad kan saindang hospital bills.
Pig-eksplikar kaini na kairiba na digdi an mga na-confine asin pig-eevaluate kan mga social worker an saindang mga aplikasyon para sa medical assistance, mantang sa mga nagpapalaboratoryo pwedesir man sinda na makakua kan nasambitang asistensya.
Dugang kan alkalde, na en kaso man na may magkua nin medical assistance kinakaipuhan man na magsumiter nin mga magkakanigong requirements.
Mientrastanto, para man sa iba pang kahaputan mapadapit sa pagkua nin medical assistance, pwedesir man na mag-inquire sa Legazpi City Hall, head asin sa mga nakadesignar na social worker kan Legazpi Hospital.
