LEGAZPI CITY- Inapod kan sarong transport group sa Bicol na ‘consuelo de-bobo’ an pagtatao nin piso na dugang sa pamasahe sa mga public utility vehicle.
Ini makalihis aprubaran kan Land Transportation and Regulatory Board (LTFRB) an hirit na dagdag sa pamasahe sa tahaw kan paglangkaw kan presyo kan produktong petrolyo.
Segun ki Tanggol Pasada Network Bicol Spokesperson Renato Piolino sa intrevista kan Bombo Radyo Legazpi na dae kaini maiibsan an pasakit sa mga drivers.
An dagdag na pamasahe an dugang pa pasanin sana suboot sa mga commuters na apektado man kan sitwasyon.
Huli digdi, padagos an pangapudan kan nasabing grupo na parikason an pagsuspinder sa excise tax sa langis huli ta mas makakatabang ini sa publiko.
Kun mapapababa suboot an presyo kan petrolyo, dae na kaipuhan nin dugang sa pamasahe ngani na dae maipasa an problema sa mga mananakay.
