LEGAZPI CITY- Nagpaabot nin pakikidumamay an Overseas Worker’s Welfare Administration (OWWA) Bicol sa nawalat na pamilya kan nagadan na Overseas Filipino Worker (OFW) sa Taiwan na napag-aramang itinapok kan amo.
Sa intrevista kan Bombo Radyo Legazpi ki OWWA Bicol Director Samuel Madrid, inasegurar kaini an tabang na mareresibe kan pamilya sa paagi kan P20, 000 na bereavement assistance.
Ipigheras man ni Madrid na an mga personahes kan Family Welfare Office kan OWWA sa Catanduanes an mahatod kan bangkay ni Rowena Guianan, 42-anyos pasiring sa residencia kaini sa Brgy. Bislig, banwaan kan San Andres.
Katakod kaini, naglalaom man an oficina sa marikas na pagresolber sa kaso ni Rowena sa tabang kan mga otoridad sa Taiwan asin Manila Economic and Cultural Office (MECO).
Mientras tanto, ipinagirumdom kan opisyal sa mga OFW asin pamilya kan mga ini an pagrenew kan membership sa OWWA tangarig na maasegurar man an magagayon na beneficio na mareresibe en kaso maimbwelto man sa bako malaen na mga pangyayari.
Napag-araman na nasa 190, 000 an Bicolano OFWs na nagtatrabaho sa ibang nacion.
