LEGAZPI CITY-Posibleng mahampang sa contempt si Office of the Vice President (OVP) Chief of Staff Zuleika Lopez kun dai masunod sa subpoena na ipinaluwas kan Senate impeachment court katakod kan impeachment trial ni Vice President Sara Duterte.
Segun kay impeachment court spokesman Regie Tongol, obligadong maghampang an mga testigong pinadarahan kan subpoena maliban kun igwang bastante asin legal na basehan ngani kwestyunon ini.
Sinabi pa kan impeachment court spokesman na dai posibleng basta negaran kan sarong testigo an paghampang sa korte huli ta an pagsunod sa subpoena, iyo an sapiritan sa irarom kan nag-iiral na regulasyon.
Sinabi pa kaini na posibleng mahampang sa contempt of court an sisay man na bigong magsunod nin warang rason.
Nilinaw man niya na tatawan muna nin tsansa si Lopez na magpaliwanag enkaso dai siya makaatendir bago magdesisyon an korte kun igwang basehan para sa contempt proceedings.
Mientras tanto, sinabi kan legal team ni Vice President Sara Duterte na wara sindang kinaaraman sa pagpasiring ni Lopez sa Senado kan Huwebes bago an nakatakdang impeachment trial sa masunod na semana.
Sinabi man ni defense spokesman Michael Poa na warang direktang komunikasyon an defense team ni VP Sara kay Lopez o sa OVP katakod kan nasabing paglilitis.
