LEGAZPI CITY – Inaprubaran na sa ika-32 na Regular Session kan 12th Sangguniang Palalawigan kan Albay an ordinansa na isinumite ni Board Member Howard Sim Imperial kun saen matatawan nin benepisyo asin insentibo an mga Barangay Daycare workers sa enterong probinsya.
Segun ki Imperial, madudugangan na an benepisyong mareresibe kan mga registered daycare workers kun saen saro nna digdi an PhilHealth Insurance Coverage.
An gabos na rehistradong barangay daycare workers an ieenroll sa national Health Insurance program ngane na makaresibe o maka-avail nin personnal health services kasabay na an in-patient hospital care, out patient care, emergency and transport services asin iba pang supplementary benefits.
Magiging libre naman an medical examination kan mga workers sa anumang ospital na pagsadiri kan gobyerno.
Matatawan pa nin libreng legal assistance an mga ini hale sa provincial legal office para sa anumang legal na problema na katakod kan saindang trabaho.
An daycare workers an matatawan man nin financial assistance na P2000 kada kwarter bilang pagreconocer sa saindang serbisyo.
Dati ng nakakaresibe nin P1,500 an mga ini puon kan taong 2004 hasta 2016 alagad kan Hulyo kan nakalihis na taon, nirequest ni Imperial na dugangan ini nin P500.
Apwera pa kaini, pwedesir naman maggamit nin mga pasilidad kan gobyerno nin libre para sa official purpose.
Siring man, matatawan nin taunang convention an mga barangay daycare workers.
Kukuwaon man an nasabing pondo para sa allowance kan maestra sa Albay Integrated Social Services kun saen aabuton nin P6.4 million an magagastos para sa haros 800 na daycare workers.
