LEGAZPI CITY-Wara pa nin pinal na desisyon sa ngunyan an mga taga-oposisyon kung sisay an saindang magiging pambato bilang Presidente, Bise Presidente asin mga Senador sa paparaning 2022 national elections.
Enot ng pighayag kan 1Sambayan coalition na sa Hunyo 12 sa mismong Aldaw nin Libertad ninda ia-anunsyo an magiging line up na ipanlalaban sa kampo ni Presidente Rodrigo Duterte.
Sa intrevista kan Bombo Radyo Legazpi kay Bayan Muna Rep. Carlos Isagani Zarate na saro sa mga kritiko kan administrasyon, maski na wara pa nin pigpapangaranan nagpahayag na ini nin suportado sa mga magiging pambato kan 1Sambayan.
Kaiba sa mga matunog na pangaran na pinagpipilian bilang pambato sa pagka-Presidente sinda Bise Presidente Leni Robredo, dating Senador Antonio Trillanes IV, Senador Grace Poe, Mayor Isko Moreno asin Senador Manny Pacquiao.
Nagluluwas man suboot an tandem ninda Senador Ping Lacson bilang Presidente asin Senate President Vicente “Tito” Sotto III bilang Bise Presidente mantang nagpahayag naman nin interes si Richard Gordon.
Kasabay kaini pighayag ni Zarate na dapat na magkasararo an mga taga-oposisyon sa pagbilog nin makusog asin saro sanang line up ngani na makalaban sa pambato kan administrasyon.
Sa ngunyan kaiba sa mga matunog na tambalan para sa pambato kan administrasyon sa Presidente asin Bise Presidente sinda Presidential Daughter Mayor Sarah Duterte asin Gilbert Teodoro o kaya an tambalang Sarah asin Rodrigo Duterte.
