LEGAZPI CITY – Nagpaluwas na nin pahayag an Diocese of Legazpi makalishis an deklarasyon kan PNP dapit sa liwat na paglalansar kan ‘Oplan Tokhang Double Barrel Reloaded’ kun sain hagad kan pambansang kapulisan an suporta kan Simbahang katolika.
Marurumduman na pighayag kan PNP na mas makakarahay kun igwang representante an Simbahan sa kada magkakaigwa nin operasyon kontra iligal na droga ngani na mahiling kan mga ini an saindang mga pigigibo.
Segun ki Father Rex Arjona, bako sa siring na paagi maipapahiling an kooperasyon kan Simbahan huli ta bako na ninda ini trabaho.
Pigduon man kaini na magkaigwa nin kritical colaboration kun sain kun marhay an piggibo kan gobyerno, sasabayan ini kan Simbahan alagad kun sala na an pigigibo siyertong dae masilensyo an Simbahan.
Mientrastanto, maugma man an nasambitan na padi sa pahayag ni PNP chief Director Ronald Dela Rosa na magigin less bloody an ikokundusir na mga operasyon huli ta sa paagi kaini mas masusunod an rule of law asin maipapahiling an pagrespeto sa human rigths.
Dugang pa ni Arjona, kun nasa tama an kapulisan, susuportaran kan Simbahan an gobyerno sa mga espuersos sa pagpapa-rehab kan mga drug personalities na saro sa mga mawot na maabot sa probinsya kan Albay.
