LEGAZPI CITY– Katakod kan pig-aantisiparan na pagdakol kan mga motorista asin bakasyonista sa rehiyon gikan sa Manila asin mga karaning probinsya katakod kan pag-girumdom kan Semana Santa, ilulunsar kan Bicol PNP an Oplan Ligtas SUMVAC 2017.
Sa intribista kan Bombo Radyo Legazpi ki PSI Malu Calubaquib, tagapagtaram kan Police Regional Office 5, maoobserbaran man an programang ini sa mga lower units kan PNP puon ngunyan na aldaw sagkod sa Hunyo 13.
Isasangat suboot sa “full alert status” an bilog na rehiyong Bicol kun sain magkakaigwa nin mga public assistance desk sa mga pyer, terminal, mall, simbahan asin iba pang matatawong lugar.
Katabang digdi kan Bicol PNP an Department of Health (DOH), mga pribadong kumpanya kabale na an mga gasoline stations, mga non-government organizations (NGO), taga media, asin iba pang volunteers ngani na masierto an salbadong pag-girumdom kan panahon kan Kuwaresma.
Alagad sigon ki Calubaquib, bako sana an season na ini an tututukan kan PNP kundi siring man an iba pang tradisyunal na okasyon arog kan Araw ng Kagitingan, Flores de Mayo, asin mga pyesta.
Apela man ni PNP Regional Director PCSUPT Melvin Ramon Buenafe an kooperasyon asin pakikisumaro kan publiko sa saindang lakdang na obhetong maprotihiran an seguridad kan publiko kabale na an mga turistang madayo sa rehiyon para sa summer season.
