LEGAZPI CITY—Preparado an mga opisyales kan Barangay Quirangay sa banwaan kan Camalig, Albay na ipaebakwar an mga residentes na nagtitinir sa 7-to-8 kilometer extended danger zone kan Bulkang Mayon en kaso na mas magkusog pa an nadadangog digdi na rumbling sounds o mga ugong.
Segun ki Kapitan Ermel Gragede kan nasabing barangay, sa intrevista kan Bombo Radyo Legazpi, ngakundusir na nin meeting an saindang barangay council mapadapit sa preparasyon asin en kaso na magtaong abiso an Municipal Disaster Risk Reduction Management Office an nakahanda man suboot sinda sa pag-ebakwar urog na an yaon sa Purok-7 kan saindang lugar o an mga nasa 7-kilometer extended danger zone kan bulkan.
Punto kaini na tuyong may Mayon eruption an igwa nang siring na senaryo, alagad an pigkakatakutan kan dae pa nag-eebakwar na nasa 7-km extended danger zone iyo an pagputok nin makusog na may nagluluwas na kalayo sa bunganga kaini, magin an ashfall.
Sienerto man kan opisyal na preparado sinda na i-pick up an mga residente sa nasabing lugar kun magpapadagos pa an siring na aktibidad.
Piglalaoman na maabot sa 400 indibidwal an ieebakwar en kaso na maglala an sitwasyon, dugang niya na mantinidong yaon an saindang evacuation center sa Bariw Elementary School, asin kun dae man magkasya pwedesir man na magtenir sa Bariw National High School kan naunambitang banwaan.
Mientrastanto, pagiromdom man kaini sa mga residenteng yaon sa 7-to-8 km extended danger zone na obserbaran an aktibidad kan bulkan, magin updated sa mga bareta mapadapit digdi, asin magin alerto anumang oras.
