LEGAZPI CITY – Ikina-ugma kan mga opisyales kan Barangay Gogon, Legazpi City an ginibong lakdang kan gobierno lokal na linigan an children’s playground sa parte kan Kalayaan park.
Segun ki Kagawad Richilda Atun sa intrevista kan Bombo Radyo Legazpi na magayon an ginibong flushing activity urog nang pigdadagsa an nasabing lugar kan mga kaakian tuyong hapon.
Paghistorya niya pa na haloy nang pigdulok kan saindang konseho sa lokal na gobierno kan ciudad na matawan nin aksyon asin maugma sinda huli ta padiit-diit nang pigtatawan ini nin lakdang.
Afuera suboot sa flushing activity asin an nakatalaang re-painting kan children’s playground an mawot man nindang mapakarhay an mga street light sa palibot kan nasambitang parke nganing magin salbado sa publikong nagpa-pasyar.
Pigtaram pa kan opisyal na nagpapadagos an koordinasyon sainda kan Local Government Unit mantang pighayag man sainda kan alkalde kan ciudad na kabale an pagpapakarhay sa saindang programa ngonian na taon.
Pagdoon niya man na an nasambitang lakdang an magigin lyabi nganing ma-enganyar an iba pang mga kaakian asin turista na magpasiring sa Kalayaan park na dakulang katabangan man para sa mga saradit na negosyanteng nakapalibot sa lugar.
Punto niya man na dapat makipagtabangan man an publiko asin mga bisita sa pagmantenir kan kalinigan kan parke sa paagi kan pagtapok kan saindang mga basura sa tamang laganan.
Pagsyerto man ni Atun sa publiko na mapasiring sa Kalayaan park na may nakabantay asin nagalibot na mga Barangay Tanod asin watchman nganing mamantenir an pazy orden.
