LEGAZPI CITY – Ikinamundo kan opisyales kan Barangay Poblacion na nakakasakop sa Guinobatan public market an nangyaring pambabadil gadan sa sarong Indian national.
Segun ki Punong Barangay Eulalia Joven sa intrevista kan Bombo Radyo Legazpi na labi niyang ikinamundo an sitwasyon kaini kan mahiling niya mismo an video kan biktima makalihis an insidente.
Suspetya niya man na posibleng may dagit an gunman sa biktima huli ta napag-araman na pagpapa-utang an negosyo kaini alagad ipigpapa-ubaya niya na sa mga otoridad an pag-aram kan tunay na motibo sa krimen.
Paghistorya niya pa na kakahale pa sana sa saiyang tiendahan an biktima kaiba an saiyang agom pirang minuto makalihis mangyari an pambabadil.
Dugang pa kan opisyal na ini an primerong bes na may nangyaring pambabadil sa sarong Indian national sa saindang Barangay.
Sa ibong kan nangyari, piglinaw ni Joven sa publiko asin sa saiyang namamanwaan na nagtetenir na salbado an Guinobatan public market asin nangapodan nin pangadyi sa nabayaang pamilya kan biktima.
