LEGAZPI CITY – Ikinaugma kan Albay Schools Division Office an matrayumpong pagbubukas kan Palarong Panlalawigan 2026 na isinagibo sa banwaan kan Guinobatan.
Segun ki Albay Schools Division Office Spokesperson Froilan Tena sa intrevista kan Bombo Radyo Legazpi na inatendiran an ginibong opening program kan manlain-laing opisyales kan Gobierno.
Maabot suboot sa 2,500 na mag delegado na kompwesto kan mga atleta, coaching staff, asin sports official an makikisumaro sa palaro sa tahaw kan nagpapadagos na aktibidad kan Bulkang Mayon.
Nakikipagkoordinar man sinda sa Philippine Institute of Volcanology and Seismology asin sa Albay Provincial Public Safety and Emergency Management Office nganing ipa-otob an saindang contingency plan enkaso may dae piglalaoman na insidente.
Pigtaram pa ni Tena na ngonian na aldaw an pagpopoon kan bakbakan kun sain kadaklan sa mga ini an gigibuhon nin maagahon nganing aprobitsaran an malimpoy na panahon.
May mga kawat man na isasagibo sa mga manlain-laing venue asin banwaan kun sain isasagibo an Badminton event sa Daraga mantang sa Camalig man gigibuhon an basketball asin gymnastics.
