LEGAZPI CITY – Ipapadagos kan Gobierno Provincial kan Albay an opening kan Palarong Panglalawigan 2025 sa ibong kan pabago-bagong panahon na epekto kan shearline.
Segun ki Albay Acting Governor Glenda Bongao sa intrevista kan Bombo Radyo Legazpi na nakakasa na ngonian an opening kan aktibidad bago pa magparauran sa provincia.
Pighiling na man suboot ninda an venue asin naglatag na nin plan b enkaso magraot an panahon sa lugar mantang preparado na man an Local Government Unit kan Guinobatan para sa pag-ayos kan venue para sa isasagibong opening sa Travesia Sports Complex.
May pigbugtak na man na mga tent nganing may masisirungan an mga atleta asin mga madalan sa aktibidad enkaso magkusog an init o an uran.
Pigtaram pa kan opisyal na pangpa-inspire lang an pagperform kan sarong actor-singer sa mga atletang albayano nin huli ta magigin preparasyon na man ini kan provincia sa paparaning palarong bikol.
Importante para sa mga jovenes an siring kaining pakawat nganing makuwa kan provincia an number 1 standing sa overall champion kan palarong bikol.
Isasagibo man an pirmahan kan Memorandum of Agreement sa pagultangan kan Bicol University asin kan Provincial Government of Albay nganing maalokaran nin pondo an maintenance kan pasilidad na gagamiton sa mga sporting events.
Pigdugang pa ni Governor Bongao na bukas sa publiko an aktibidad asin dae man papahaluyon an durasyon kaini nganing amay na matapos an opening ceremony kan palarong panglalawigan 2025.
