LEGAZPI CITY-Nagtutol si Senador Juan Miguel Zubiri sa online gambling sa nacion asin pigapod niya ining “silent epidemic” na padiit-diit na nagraraot sa mga Pilipino.
Sa pagpopon kan 20th Congress, pigsangat ni Zubiri an panukalang ley na obhetong ipagbawal an online gambling o an “Anti-Online Gambling Act of 2025.”
Segun kay Zubiri, iba na an itsura kan gambling addiction ngonian, asin nalululong na an mga tawo sa casino asin sabungan. An mga kajovenesan suboot nagaabot na alas 2 nin pagkaaga asin nalulugi na an kada pamilya sa online casino site.
Ipagbabawal kan panukalang batas an gabos na klase kan online gambling sa nacion asin dai tutugutan an simpleng regulasyon.
Kairiba man suboot digdi an mga digital betting platform, mobile application, asin an mga website na naggagamit nin cellphone, tablet, o computer ngani makapagtaya.
Sakop kan panukala an parehong lokal asin offshore-operated gambling sites na nagtatarget sa mga Pilipino.
Ipagbabawal man an mga digital wallet asin mga payment service providers, asin iba pang nagpoproseso sa transaksyong may kinaaraman sa online gambling.
Papanaguton man suboot an mga entity na nagtatabang sa pagtataya, pagpapalakop kan pagsususgal, o magin sa pag-aanunsyo kan mga betting site, magin sa tradisyunal na media, social media, o sa paagi kan influencer marketing.
Mahahampang man an mga nagbabayolar sa katakod na padusa asin magkakaigwa bib multa nin dai mababa sa ₱20 milyon asin 6 na bulan na suspensyon kan lisensya.
Sa ika-2 na pagbayolar, pwedisir magabot sa ₱50 milyon an multa asin igwang sarong taon na suspensyon kan operasyon.
Sa ika-3 na pagbayolar, igwa na multa na dai mabaab sa ₱100 milyon, permanenteng pagbawi kan lisensya, asin paglilitis sa mga enot na opisyal kan kumpanya, na pwedisir na makulong nin 6 na taon.
