LEGAZPI CITY- Binuksan na sa provincia kan Masbate an One Town, One Product o OTOP Nook ngani na mas mairani pa sa mga turista an mga Bicolano products.
Segun ki Department of Trade and Industry Masbate Provincial Director Butch Castro sa intrevista kan Bombo Radyo Legazpi na ipiglaag an nasabing mga produkto sa hotel na komon na pigdadagusan kan mga turista.
Imbes na suboot na magpasiring sa manlain lain na tindahan an mga turista, madudukayan na kan mga ini an mga produktong saindang pighahanap sa sarong lugar sana.
Sinabi kan opisyal na nasa 20 na mga Micro, Small and Medium Enterprises an kasumaro sa nasabing programa.
Sa paagi kaini, mas makakatipid na nin panahon asin gastos.
An nasabing programa an pinuunan sa provincia kan Albay bilang pandemic response initiative ngani na matabangan an mga Ministry of Micro, Small and Medium Enterprises na naapektaran kan pandemya.
Napag-araman na sa bilog na rehiyon nasa 20 na an mga One Town, One Product kaya dinara na man ini sa island province.
Dugang pa ni Castro na sa presente, inadaptar na man an kaparehong programa magin sa manlain lain na mga nacion na dakulang tabang para sa mga saradit na negosyante sa rehiyong Bicol.
Sinabi pa kan opisyal na warang dapat ikahadit an mga turista asin mga consumidores huli ta an presyo sa mga OTOP Nook an kapareho kan presyo sa mismong supplier.
