LEGAZPI CITY-Inanunsiyo ni President Ferdinand Marcos Jr. na pigrekomenda na kan Office of the Ombudsman an pagsasangat kan kasong kriminal laban sa mga imbuelto sa suboot ghost flood control project sa Kulaman, Jose Abad Santos, Davao Occidental na nagkakantidad nin haros P100 milyon.
Susog sa Presidente, nanotaran kan Ombudsman na may basehan an enot na sinangat na kaso na may kinaaraman sa malversation through falsification asin pagbayolar sa Section 3(e) kan Anti-Graft and Corrupt Practices Act an nagkapirang personalidad hale sa St. Timothy Construction Corporation asin nagkapirang opisyal kan Department of Public Works and Highways (DPWH).
Nagluwas man sa imbestigasyon na pigtutubudang naggamit nin pekeng dokumento an mga imbuelto sa enot nang pondo kan proyekto maski warang nangyaring aktwal na konstruksyon.
Kairiba sa mga pigrereklamo hale sa St. Timothy Construction sinda Cezarah Rowena Discaya asin Maria Roma Angeline Remando.
Siring man an nagkapirang DPWH personnel na suboot nagparikas kan pag-apruba kan mga dokumentong nagresulta sa pag-release kan bilog na kanridad.
Patuloy man na pigbubusok kan Ombudsman an kaso ngani mapanimbag an mga posibleng responsable sa nasabing mga anomalya sa proyekto.
